Act 2 | WSK | STEP | Pentecost tom tai aratam se nuna kawam suwanta wore ningi biguwuman ale bagakasan.

Acts 2

Korang Bur tai kaparam

1 Pentecost tom tai aratam se nuna kawam suwanta wore ningi biguwuman ale bagakasan. 2 Se tairatela nirung bo duruk wonong te tai kaparam, daula biya ko nirung iwita, ale kawam nuna ningi dagiwaman mu terong mam. 3 Ale tama kuamili iwita aratam se nuna aringiman, se tama kuamili papak mam ale kariimet suwan suwan nusupuling te kapakaso. ^{▼▼Acts 2:3-4 Den saki me ikia wore te munakara: Mark 16:17; Acts 4:31; 10:44-46; 19:6; 1 Cor 12:10.} 4 Ale nuna suen la Korang Bur nungumik ningi nama saparam, ale nunga saongam, se den saki saki nuna me ikia wore te munakakasan.

5 Juda sang ali sor suen biya ko taiman Jerusalem anikasan, ale nuna Kaem ko nguangara ale nup patowara ko kari tala. 6 Se den nirung mu aratam se kariimet motam biya tai bolala awuman ale olekem alo nononga den kirker wore te munakakasan se iki gilingiman, 7 ale ninguru biririkiman ale ko nungamin yenakaso. Ale balukasan, “Kari suen la imi mu Galilee kari la! 8 Bare duap awuk se nuna ana wonong kirker wore nanga den te munakasan se ana ikisan a? 9 Ana Parthia, Media, Elam kariimet; se Mesopotamia, Judea, Cappadocia, Pontus, se Asia kariimet; 10 se Phrygia se Pamphylia, Egypt, se Libya komasang Cyrene ko pingita; se ana sang mu Rome kari taiman imi te bagasan, 11 saki Juda nunga gue te, se sika ali sor kari sang Juda nunga kilek taman mu; se ana sang Crete se Arabia; bare ana suen la nuna Kaem ko ura ningo ningo beteram wore ko dugu duap anananga den te balsan se ikiwasan!” Nuna buta balukasan. 12 Ale nuna suen la tengeman ale nungamin tugukasan, ale nunumi isaru se balukasan, “Mel imi ko duap awuk a?” makasan.

13 Bare sang olekem nunga gusirukasan, ale nunga balukasan, “Kari umutang yu biyala naman ale den duap duap te munakawasan,” ma balukasan.

Peter kariimet motam biya den nunga maonam

14 Se Peter apostle 11 mu arungak sanamiwa biyala kariimet nunga maonam, “Nina Juda alo, se nina awiriya suen la Jerusalem bagasan, mu nedegewa tagiralko. Ani mel imi ko duap ninga manik se ninguru ikialko. 15 Nina ikisan kari imi yu naman masan, bare mu mena. Kari imi yu me naman. Imi 9 o'clock tumongola! 16 Bare mel imi prophet Joel maingkala ko iwita balam:

17 ‘Kaem balam: Tom nukum te ani Korang Bur biyala bitirik se
kariimet suen la nongote kapurukkowo mam.
Se nenenga kuriang kari, se nenenga kuriang imet, mu agiring tamon balmonko.
Se ninga kari kulak ipingira te iwita mel aringimonko,
se nenenga kari garuk mu ipingimonko.
18 Tom mu te ani Korang Bur biyala bitirik se aga ura kari ta, ura imet ta, nongote tai kapuruk se
nuna te agiring tamon balmonko.
19 Ani mel koma kigilik taiti bowa ko bitirik se aratukko,
ale ali te mu betelatala mel koma kigilik tala bitirik se aratukkowo;
gue, se tama, se tama bur gotek am mena.
20 Worem motam tiromorom paguk, sige motam guar mauk,
se ko udagi umutang Kari Biya ko Tom Biya, ko nikim ko nguangara ago, umutang aratukkowo.
21 Se awiriya Kari Biya nu sangukko aurok, umutang Kaem nu sangaru taukko.’ ^{▼▼Acts 2:17-21 Joel 2:28-32.}
22 “Nina Israel kari, den imi ikialko: Jesus, Nazareth kari, mu munan ningo ningo kilek bibiya ninga ningi bitakaso se arikasan, mu nina nengeta ko ikisan. Mu munan umu te Kaem nina ninga kasurukaso mu nu Kaem kote tairam. 23 Kaem mel aratukko ko iki se kari imi nina nigiting te beteram ^{▼▼Acts 2:23 Kaem mel aratukko mu giriso balso: Acts 4:27-28.} se nina moman se kueram. Mu nina kari munan me ikia alo mu nuguting te beteman se tam kangono te ituwuman se kueram. 24 Bare Kaem aking kari mu patowaram se barasam. Nu kua iwi namara ko mutim ningi, bare Kaem bataguru tam. Mu awuk, kuera mu kari mu ilukuawurokko me terong. 25 Se David nu iwita balam:

‘Ani tom suen biya te Kari Biya ani agarak pingita bagoso mu ariwasam.
Nu ani abeta duap te bagoso se me nguangasam.
26 Buta se ani angamang ninguru amilmiloso,
se agiring te ago la amilmilasam.
Ale kuerikko mu me ko nguangasam.
27 Mu awuk, ni aninga bitar se mutim ningi tawun biya me bagirikko;
nika kari kako bitar se me iwirokko.
28 Ni marak ko lage maingkala ani aga kausem.
Ni ani agarak bagerko se umutang ko ani ninguru amilmilirikko.’” ^{▼▼Acts 2:25-28 Psalm 16:8-11.}
29 Peter balam, “Aga singsang, ani wetang te ninga manorsam, anananga taleng David kueram se mutim tugu gilingiman, se ko kuwim te mutim tuguman mu tom imi te am aniso. 30 Bare nu prophet, se Kaem den nu maonam ale nunguningta nunguning mam mu nu ko ikiam, David kota ko taleng girigir bo ko kuwim te bitiruk se king ko bagurukko balam mu ikiam. 31 Ale nu Kaem mel bitirukko mu giram arigam ale Kristus kueruk ale aking barasukko mu ko iwita balam: ‘Kaem nu bitiruk se mutim ningi tawun biya me bagurukko,’ mam. ‘Se ko kumik guang me iwirokko tala,’ mam. 32 Kaem Jesus borta patowaram se barasam, se ana suen la agotala balsan. 33 Aitak nu nama tarigiram ale Kaem ko kuting sengam mu te dagiwoso. Ale Korang Bur, ko Nuet ulengkala tuokko balam, butata nu Nuet kuting te tam ale aking nangaram. Buta se mel suen biya nina aitak ariwasan, ko ikiwasan mu te aratuwoso.

34 “Mu awuk, David mu nu duruk wonong te me namaram. Bare nu balam,

‘Kaem aninga Biya iwita maonam:
Ni aninga agiting sengam mu te dagi sager,
35 se ani kari nikerak kagersan mu nunga gi ka siwik duap ningi nunga awurekko,’ ma balam. ^{▼▼Acts 2:34-35 Psalm 110:1.}
36 “Buta se nina Israel suen la mel imi ko ninguru ikialko: Jesus nina tam kangono te tagiman mu borta Kaem Kari Biya ko beteram se bagoso, mu borta tala Kristus ko beteram se bagoso.”

Kariimet suen biya giris palagaman ale anuwa taman

37 Se kariimet den mu ikiman se den mu nongomang ninguru batogam. Se nuna Peter se apostle saki ago nunga manorman, “Kari,” maman, “se ana aitak awuk manak i?”

38 Se Peter nunga maonam, “Suwan suwan giris palagal ale Jesus Kristus nup te anuwa tal, se Kaem ninga memek siwu sapuruk ale Korang Bur ningarukko. 39 Mu awuk, Kaem balam, munan mu suen la nina ninga kuriang arungu am talko mam, ale imet kari Juda ko mena mu ago am tamonko mam, arikaya anananga Kari Biya Kaem nunga aruso mu ago la.”

40 Se Peter den suen biya agotala nunga maonam, ale den aora tala nunga maonam, ale “Sinar talko!” mam. “Nina kariimet memek owore arungu memek tal bore ko!” 41 Se kariimet Peter ko den ninguru ikiman mu nuna anuwa to gilingiman. Tom mu te Kaem 3000 kariimet iwita nunga gi Kris alo arungu nunga biguwuram.

Nongomang ningi nunguning alo bagara suwanta

42 Nongomang ningi nunguning alo tom suen biya biguwukasan ale apostle kausa den balukasan mu ikikasan. Ale nongomang suwanta baga se inang nokasan, ale ngatangakasan. 43 Nuna suen la Kaem ko nguanga se ko nup patawu se bagakasan. Se apostle alo munan bibiya kilek duap duap bitakasan. 44 Pempem la Kris alo biguwukasan ale bagakasan, ale nongota nunga mel nunumi te sangarukasan. ^{▼▼Acts 2:44 Nuna nunumi sangarukasan: Acts 4:32-35.} 45 Nuna nunga ali melmasak diakasan ale koma manga tokasan ale nunga saki nungumik mel mena mu nungarukasan. 46 Tom suen biya nuna temple ningi nunumi biguwukasan. Ale nunga kawam kawam biguwukasan ale amilmil te, nongomang ningi nunguning te inang nokasan. Ale tom suen biya Kaem nup patawukasan. Se kariimet nungarkikasan mu nuna kariimet ningo, se nunga kuakasan. Se pempem Kari Biya kariimet sang iru giris palagakasan mu nunga gikaso ale Kris alo arungu nunga biguwukaso.

47